سياسة الخصوصية
آخر تحديث: 31 أكتوبر 2026
1. بنجمع إيه
لوحة الشغل: من جوجل اسمك وإيميلك بس (أو الإيميل اللي سجّلت بيه)، ومنك رقم الموبايل وبيانات الإعلان اللي بتكتبها (المجال، المكان، المرتب، المؤهل…). أداة خط سير المندوب: الأوردرات اللي بتضيفها (العنوان، رقم الأوردر، موبايل العميل، المبلغ وطريقة الدفع، وصورة لو صوّرت)، وبيانات المركبة، ومواعيد الورديات — ومكانك (GPS) كل كام ثانية طول الوردية والصفحة مفتوحة. مش بنجمع جهات اتصالك، ومش بنتتبعك برّه الوردية أو برّه الأداة.
2. بنستخدمها في إيه
لعرض إعلانك ومراجعته وحماية المستخدمين من النصب والإزعاج. وفي خط السير: نرتّب أقصر سكة لأوردراتك ونعيد الترتيب لو خرجت عن الطريق، ونطلعلك تقارير الكيلومترات والوقت والتسليمات. مش بنبيع بياناتك ولا بنستخدمها في إعلانات موجّهة.
3. تسجيل المكان أثناء الوردية
تسجيل مكانك جزء من الشروط اللي وافقت عليها وأنت بتسجّل (البند 9). أول ما تبدأ أول وردية بنسجّل موافقتك على الخادم بوقتها ونسخة الشروط، عشان نثبتها. بنسجّل المكان بس وانت في وردية والصفحة مفتوحة، ونقطه بتتمسح بعد 90 يوم. لو وقّفت «تسجيل مكاني أثناء الوردية» من القايمة، التسجيل بيقف فورًا والخادم نفسه بيرفض أي نقطة، والأداة تفضل شغالة للتخطيط. تقدر ترجّعه في أي وقت.
4. مين بيشوفها
بيانات الإعلان ظاهرة لأي زائر. رقم الموبايل والواتساب بيظهروا للمستخدمين الداخلين بحساب بس. إيميلك مابيظهرش لحد غير فريق المراجعة. بيانات خط السير (المكان والأوردرات والصور) ليك أنت بس — مفيش حد تاني في التطبيق، ولا الأدمن، عنده صلاحية يشوفها. (مزوّدي الاستضافة في البند 5 بيخزّنوها بس ومابيستخدموهاش.)
5. جهات تانية بتعالج بياناتك
openrouteservice (HeiGIT، ألمانيا): لحساب السكة وترتيب الأوردرات بنبعتلهم إحداثيات الأوردرات ومكانك الحالي، ولما تدوّر بعنوان بنبعتلهم النص اللي كتبته ومكانك التقريبي عشان النتايج تطلع قريبة منك — من غير اسمك ولا موبايلك. خرايط OpenStreetMap: موبايلك بيحمّل صور الخريطة من سيرفراتهم فبيشوفوا عنوان الـIP والمنطقة اللي بتتفرج عليها. الاستضافة: Vercel (التطبيق) وSupabase (قاعدة البيانات والصور) — بيخزّنوا البيانات لحسابنا بس.
6. بنحتفظ بيها قد إيه
الإعلان بيفضل منشور 30 يوم من الموافقة. نقط مكانك (GPS) بتتمسح لوحدها بعد 90 يوم. الورديات والأوردرات والصور والمركبة بتفضل لحد ما تمسحها أنت. حسابك وإعلاناتك بيتمسحوا لما تطلب ده.
7. حقوقك
من خط السير ← القايمة ← «بياناتي» تقدر تنزّل نسخة كاملة من بياناتك (ملف JSON) أو تمسحها كلها نهائي بنفسك، وتسحب موافقة التتبع في أي وقت. ولأي طلب تاني (تعرف بياناتك، تعدّلها، أو تمسح حسابك) راسلنا على support@dossahub.com — طبقًا لقانون حماية البيانات الشخصية المصري رقم 151 لسنة 2020.
8. الكوكيز
بنستخدم كوكي واحدة ضرورية لتسجيل الدخول، وبنحفظ اختيار اللغة على جهازك. مفيش كوكيز تتبّع أو إعلانات.